Cisco denuncia a Apple por empregar a marca iPhone sen a súa autorización
xoves, 11 de xaneiro do 2007
- Linksys leva tempo comercializando produtos baixo a marca iPhone
Cando non transcorreron nin dous días dende
que a compañía Apple anunciara con bombas de palenque o lanzamento dun novo
dispositivo que integra móbil, acceso a Internet e iPod nun só aparello, o
grupo informático estadounidense Cisco Systems vén de presentar perante un
tribunal de California unha
demanda contra a compañía de Steve Jobs, por apropiarse de xeito indebido
da súa marca comercial iPhone.
De xeito paralelo, Cisco emitiu un comunicado no que asegura que mediante a
demanda, “aspira a evitar que Apple
infrinxa e copie de xeito deliberado a marca rexistrada iPhone”, obtida en 2000
trala adquisición de Infogear e coa que xa vendera produtos baixo este nome
durante uns anos.
O rexistro da dita marca por parte de Infogear remóntase ó 20 de marzo de 1996,
cando unha filial de Cisco Linksys
comezou a desenvolver produtos baixo esta marca. Segundo explica esta empresa, ambas firmas
mantiveron unha serie de negociacións despois de que Apple solicitara permiso
repetidamente para outorgarlle o nome de iPhone
ó seu novo dispositivo.
Esta semana, despois de 30 meses e millóns de dólares investidos en segredo,
Apple presentou o seu novo aparello “sen
ter en conta o impedimento que ofrecía inicialmente Cisco”. Isto podería
traducirse nunha indemnización millonaria para a compañía que rexistra a
patente, xa que despois do rotundo éxito que obtivo o dispositivo de Apple
semella difícil que esta compañía cambie de idea e renuncie á marca.
Pola súa banda, a multinacional de Steve Jobs deféndese das acusacións de Cisco
aclarando que a demanda é “ridícula”
e que os dereitos de marca que tiña eran moi “tenues”, posto que “xa
existían varias compañías que usan o nome iPhone para os seus produtos de voz
sobre a Internet”.