Creadores e teóricos avogan no CCG por reivindicar a identidade galega nas redes
xoves, 22 de xuño do 2017
- A artista galega Cristina Pato participou no segundo día das xornadas do Consello da Cultura Galega
Onte
proseguiron os debates arredor da información nas novas canles
comunicativas (como xestionar a información, como poñela en valor,
como valorala e respectala ao tempo que a democratizamos) que
organiza o Consello da Cultura Galega na súa sede de Compostela. Se
no
primeiro día de actividades fíxose fincapé en re-actualizar o noso
xeito de xestionar e protexer os datos, onte os
relatores incidiron na importancia de difundir a identidade cultural.
Participaron (esta cuarta feira) a gaiteira Cristina Pato e o
catedrático en Teoría do Sinal Domingo Docampo. As súas
intervencións complementarias (dende a creación e e dende a teoría
da creación) serviron para amosar cara a onde se dirixe a industria
cultural galega. Unha das conclusións da xornada foi que “a
diversificación da creación canda a un mercado desenvolvido
tecnoloxicamente son necesarios para situar a nosa cultura no mundo
global”. Dito doutro maneira: precisamos máis que nunca ser nós
mesmos e selo, tamén, nas novas tecnoloxías.
Como
lembraremos as xornadas A
industria cultural galega no horizonte 2025 viñeron da man
de Xosé López, Víctor Freixanes e Berta García Orosa. Nelas
participaron preto dunha vintena de teóricos e creadores. O seu
obxectivo foi debater acerca da relevancia dos contidos e da
comunicación, dende unha óptica da nosa terra.
A
segunda sesión arrincou coa exposición de Domingo Docampo,
catedrático en Teoría do Sinal, que deparou agoiros positivos para
Galicia: “Estamos onde hai que estar e temos infraestruturas e un
sector das novas tecnoloxías da información”. Segundo fixo saber
os restos pasan por “achegar as infraestruturas de banda larga a
todo o país” e recoñecer que “a fenda dixital hoxe é
cultural”. O perfil completouno Berta García Orosa cun relatorio
no que expuxo resultados do grupo de investigación en comunicación
Localcom que incidía na perda de espazo comunicativo e cultural por
mor da crise do que aínda non nos recuperamos.
Cristina
Pato, pola súa banda, comezou a súa intervención tocando unha
pequena peza para explicar como “a gaita deixou de ser un
instrumento que tocaba para ser o eixe da miña carreira”. Partindo
da experiencia de seu avaliou o que sería o perfil da artista
sustentábel do século XXI, que “xunta entusiasmo, paixón,
aprendizaxe continua e unha boa estratexia comunicativa”. Segundo
fixo saber, “estamos nunha industria cambiante, se antes era una
discográfica a que editaba, agora recorres ao crowfunding
para financiar os teus proxectos, alén de petar en moitas outras
portas” afirmou.
A
versatilidade de Pato foi reivindicada posteriormente por Víctor
Freixanes, presidente da RAG, quen dixo que o seu exemplo mostra “as
características esenciais dunha artista que estaba na nosa cultura
tradicional e ofrecer a súa proxección no mundo en pé de igualdade
con outras culturas”: Nesa liña tamén incidiu María Yáñez,
especialista en estratexias nas redes, que afirmou que “canto máis
singulares sexamos máis visíbeis e relevantes estaremos na Rede”.
No
serán, a escritora Inma López Silva centrou a situación das artes
escénicas en Galicia caracterizada polo efecto da crise, pola
dependencia do investimento público e moi deficitario nos públicos.
A novelista propuxo “un cambio de modelo no que sexan os públicos
os que sustenten o cambio”. Agar Ledo, pola súa banda, achegou un
estudo do sector das artes visuais mentres que Nieves Rodríguez
Brisaboa falou das industrias arredor da Rede. Francisco Campos
pechou a cita cunha conferencia sobre a economía da cultura en
Galicia.