Google Maps veta temporalmente o seu acceso dende móbiles con Windows Phone
luns, 7 de xaneiro do 2013
- Algunhas versións locais de Google Maps aínda están dispoñibles dende Windows Phone 8
A postura de Google no mercado dos dispositivos móbiles está
a ser moito máis agresiva do que parecía, e en vista das últimas novas ao
respecto, entendemos que ten unha forte presenza en dispositivos con iOS
simplemente porque esa foi a plataforma de entrada e a que gozaba ata hai pouco
dunha posición que liderado indiscutible, de xeito que ausentarse de tal
plataforma podería prexudicar seriamente a Google, pero a compañía de Mountain
View defende a Android con forza como axente dominante, e está a pór moitos
atrancos á entrada dun novo actor, especialmente se este é Microsoft, e tras
negarse a apoiar a Windows 8/RT, chega agora a ofensiva contra Windows Phone 8,
que vai dende impedir
a creación dunha digna aplicación de YouTube a unha nova polémica: vetar o
acceso a Google Maps dende os móbiles co sistema operativo de Microsoft.
Este último movemento resulta difícil de entender, pois aínda que os móbiles
con Windows Phone 8 xa contan cunha digna ferramenta de mapas (achegada por
Nokia) na web Google Maps goza de boa implantación e, ata hai pouco máis dunha
semana o servizo estaba dispoñible sen problema, pero misteriosamente Google
comezou a redirixir aos usuarios de Windows Phone 8 que cargaban a páxina web
dos seus mapas a google.com, argumentando inicialmente que non daban soporte ao
navegador web móbil de Internet Explorer por estar o seu servizo deseñado para
WebKit (afirmación que non se sostiña polo feito de que o servizo si funcionaba
sen problema nos móbiles de Microsoft á vez que a versión británica dos mapas
aínda permanecía accesible).
Esta decisión de Google causou indignación nos usuarios, o que parece
levalos a rectificar publicando un comunicado no que aseguran que “recentes melloras na versión móbil Internet
Explorer e Google Maps achegan agora unha mellor experiencia e estamso a
traballar en eliminar a redirección. Continuaremos a probar a compatiblidade de
Google Maps con outros navegadores web móbiles para asegurar a mellor
experiencia posible para os usuarios”.