Increméntase considerablemente a venda de tarxetas para a TDT de pago

Segundo un informe publicado pola compañía GfK Retail and Technology, a cuarta empresa de investigación de mercados no mundo que centra a súa actividade principalmente na área da tecnoloxía, a venda de tarxetas para a TDT de pago acadou durante a última semana de setembro, “o máximo semanal de vendas dende o seu lanzamento a finais do mes de agosto”.
GfK Retail and Technology audita semanalmente as vendas de tarxetas (Gol Televisión e Premium), de adaptadores CAM, de Receptores dixitais para a TDT de pago e de televisións planas compatibles coa TDT de pago, e dende a última semana de agosto (coincidindo co comezo da Liga de Fútbol en España e co nacemento de Gol Televisión), a compañía detectou o máximo de vendas semanais durante a última semana de setembro.
Asemade, a auditora tamén destaca a evolución das vendas de receptores dixitais compatibles coa TDT de pago durante o mes de outubro, sendo a semana do 12 ao 18 de outubro, “a súa mellor semana dende o momento no que estes dispositivos comezaron a comercializarse”.
Por comunidades autónomas, son Cataluña, Madrid e Andalucía as que se reparten os 2/3 da totalidade de vendas de tarxetas en todo o país, comunidades que casualmente, teñen catro equipos españois xogando a Champions League.
Por outra banda, Madrid é a comunidade que máis televisións planas vende e Cataluña é a que leva a palma na venda de televisións con ranura PCMCIA.