Sony confirma a rebaixa da PS2 nos EE.UU.

Esta mañá Sony anunciou oficialmente que a PlayStation 2 baixará a partir de mañá o seu prezo nos EE.UU. de 129,99 a 99,99 dólares, o que suporá un importante pulo para esta consola que pese a estar destinada á súa pronta desaparición, conta cun impresionante catálogo de preto de 1.900 xogos, o que fai que continúe a ser un dispositivo moi atractivo, e que continúa a ter millóns de usuarios en todo o mundo, o que notouse claramente no mercado español, no que a vella PS2 ocupou o 24% das vendas de videoxogos en 2008 (en número de unidades vendidas, de xeito que sería a plataforma que máis vende, superando incluso á Nintendo DS), con títulos de grande éxito coma os SingStar, os Guitar Hero ou as entregas anuais das franquías futbolísticas (FIFA 09 e Pro Evolution Soccer 2009).
A PlayStation 2 está actualmente no seu 9º ano de existencia, polo que é de agardar que remate o seu ciclo de vida o ano que vén, aínda que non sorprendería que continuase a chegada algún título puntual durante máis tempo se atendemos a que este mesmo mes saíron uns 9 xogos para esta supostamente obsoleta consola.
En Europa seguimos sen saber as consecuencias que terá esta rebaixa norteamericana, pois nas nosas fronteiras a PS2 xa custa 99,95 euros (incluíndo un xogo de regalo en moitos establecementos comerciais) e a marxe de rebaixa estaría bastante limitada.