R mira cara o futuro con optimismo
xoves, 14 de abril do 2011
O conselleiro delegado de R, Arturo
Dopico, foi o protagonista da segunda xornada do Ciclo de Conferencias de Alta
Dirección Empresarial que se celebrou onte na Universidade de Vigo, onde lles
mostrou aos futuros empresarios e economistas galegos alí presentes, os froitos
da estratexia baseada na innovación que a compañía de telecomunicacións levou a
cabo para estar onde está agora.
No Diario
da Universidade de Vigo (DUVI), podemos ler que na súa intervención, entre
outras cousas, Dopico afirmou que “no
horizonte de R non hai máis que fibra óptica”; ao que engadiu que, “é o futuro inevitable e polo que apostamos
firmemente cando todo o mundo falaba de wireless”.
Cun 13,9% de crecemento medio
nos últimos cinco anos, R “mira ao futuro
con optimismo”, malia que, segundo Dopico, “queda moito camiño por percorrer para seguir crecendo”.
Tampouco son bos tempos para o sector das
telecomunicacións, porén malia á crise, é un eido que está a a aguantar
bastante ben o tipo, e no caso particular de R, “o único operador que naceu en España sen socio tecnolóxico”, vai
superando ano tras ano as súas previsións de negocio.
“Foron
moitos os que non creron na viabilidade deste proxecto”, explica o conselleiro delegado de R, “pero hoxe as cifras falan” e seguen a ser positivas.
No DUVI rexistran as súas verbas: “co ADSL chegando á fin do seu traxecto, agora
toca investir en fibra e Europa non pode quedar atrás, a remolque dos países
asiáticos”, asegura.
Dopico reafirmou a súa aposta polo cable
afirmando que, “o crecente tráfico de
datos no que se refire a vídeo, 3D e alta definición non é soportable para os
móbiles, só o sería para a fibra óptica NGA, o móbil ten perdida esta batalla,
non pode competir”, conclúe.